Raupapa 1 - Ngā reta i tuhia ki a Donald McLean (reo Ingarihi)

He raupapa rahi, ka 14,500 ngā reta, mai i te tini o ngā kaituhi reta. He mea pā te nuinga ki ngā mahi a McLean hei mōkai matawhānui, hei kaitōrangapū hoki, tae atu ana ki ngā reta ā-whānau me ngā reta hoki e pā ana ki te whakahaere i ana rawa ki Heretaunga.

Ko te mana me te whakaawe a Donald McLean mai i te kōtuitui o ana kaiwhakaatu, ana hoa, me ana whakapānga puta noa i Aotearoa. Nā te tuhi reta i taea ai te whakapā atu, te whakapā mai. Kī pai ngā reta i te mōhiohio mō ngā hītoriana o te takiwā, ngā kaituhi oranga, ngā tumu kōrero ā-iwi, tae atu ana ki te tirotiro i ngā whakawhitiwhitinga i waenga i te Māori me te Pākehā.

Ko ngā reta mai i ngā mihingare tētehi rahinga o ngā reta moata, i a McLean e tū ana ki waenga o te Kaitiaki Take Māori (Protectorate of Aborigines.) I roto i ngā tau 1850, he mea pā te nuinga o ngā reta ki āna mahi ā-ture, ā-hoko whenua hoki. Ko ētahi tino kaituhi reta o tēnei wā, ko tōna tuarua i Taranaki ko Henry Halse, me tāna kaimahi i te Tari Hoko Whenua, ko George Cooper.

I a McLean e whakatū ana i tāna pūtake ōhanga, tōrangapū hoki ki Heretaunga i ngā tau 1850, 1860 hoki, ko tōna tino hoa tōrangapū ko John Ormond tētahi anō o ana tino hoa kaituhi. Nō muri o tāna tū hei Minita o Te Karauna i te 1869, ko te nuinga atu o āna tuhi he tuhi ki ētahi atu kaitōrangapū.

Ko ngā reta taketake he mea kua whakarārangi ā-pūtia mā te ingoa o te kaituhi. Heoi anō he tūmomo rapu anō ka taea. Kei te nuinga o ngā reta he rā tuku, he ingoa o te kaituhi, ka taea ai te rapu mā ēnei tūāhua nei. Kei ētahi anō he wāhi i tukuna mai ai.

Nō ngā tau moata o ngā 1950 ka patohia te tokomaha o tēnei raupapa e ngā kaimahi o Te Wharepukapuka o Turnbull. Ko ngā mea e wātea ana kua tāruatia ki te taha o te whakaahua āmati o te reta, ka taea hoki te kite mā te rapu kupu matua. Me mārama mai ko aua patohanga nei he tauira noa, nā kei te hē te patohanga o ētahi o ngā kupu.

Ka 14,501 ngā tuemi ki tēnei raupapa, o reira ka 4,023 kua patohia hōutia.

He tangata pōtae maha. Ētahi whakaahua e rua o McLean, i ngā 1850 (taha maui) me ngā 1860.

He tangata pōtae maha. Ētahi whakaahua e rua o McLean, i ngā 1850 (taha maui) me ngā 1860.
1/2-022090-F
Pūranga Whakaahua
Te Wharepukapuka o Turnbull